نوشت: وسعت اللہ خان
مَٹ: عتیق آسکوہ بلوچ
لاڑکانہ ٹی نشہ اٹ غرق ہندی آ بااثر آتا دُو تیان شئر پاروک ثمینہ سندھو ءِ پُر آ ساز و زیمل نا مجلس اٹ کسفیر، ای ہم ٹویٹر و فیس بک آ بھاز مذمت کریٹ و تینا ٹی وی شو اٹ دڑدی ءُ توار ئسے اٹ ’نن امر پد تمانُن‘ ڈَول نا افسوز نا درشانی ءِ کریٹ۔ دا بیمانہ خون آن گڈ ای برانزی دستخطی مہم اٹ بشخ ہلنگ کن ہم تیار اُٹ۔
ولے ثمینہ سندھو کُون آ بے وارث آتیکن ریلی یا برانز اٹ تولنگ نا بشخ اس مننگ کنکن دیخہ در سخت ءِ۔ اسٹ تو مُدبھاز زیات باسن ءِ، دوارہ دا کہ ثمینہ نا سیالی شئر پاروکا تپہ غان ءِ۔ انت دا گنج اَف کہ اونا سیالی اٹ بروکا منہ شئر پاروک و سازندہ غاک منہ چنکو شار اٹ برانزی مچی ہڈ تسر و انتظامیہ او پارہ غام پام ہم کرے۔
 |
| Samina Sindhu |
نمے آنبار کنے ہم ہزارہ قوم نا نسل کشی آ بھاز افسوز ءِ۔ اُست ہشنگک کہ کوئٹہ اٹ اوفک دے تا دے پاش آ آسمان نا مونا بیرہ دا خواست تون ہر وخت تولسہ کارہ کہ اوفتے ہم بے دس بیم آن زند گدریفنگ نا حق تننگہ۔ اخہ در لجّی مروکو ہیت ئسے کہ اسہ وزیر، مشیر یا غیر ہزارہ معتبر اس ہمدڑدی کن منہ گھنٹہ ہم ہزارہ دھرنہ اٹ تولنگ کہ تیار اَف۔ ولے کنے ہم ہچبر دا خیال بتو، انت فائدہ حق و نہ حق متنازعہ مننگ و خن تیٹ بننگ اٹ۔ کنا تولنگ آن اوفتا کسیفنگ ہرا سلو۔
ایہن ہم ای اسہ غیر جانبدار پروفیشنل ئسے اُٹ۔ کنا خوانوک و اُروک آتیٹ سُنّیک ہم بھلو کچ اسیٹی ءُ۔ حق و نہ حق اسہ شیعہ و او ہم ہزارہ ئسے تون اوار عکس اٹ بننگ اٹ انت فائدہ؟ سوشل میڈیا نا حد اسکان ہمدڑدی بس زَبر ءِ۔
بے گناہ مشال خان نا مُچی نا دُوآن کسیفنگ آن کروڑ آتیانبار کنا اُست ہم شولینگا۔ ولے دانا دا مطلب تو اَف کہ مشال خان نا حق اٹ پاش آن پاش لکھنگہ و ہرا بندغاک مشال خان ءِ توہینِ رسالت کروک سرپند مننگو اوفتا جلسہ و ریلی تا ورندی اٹ نن ہم اسہ جاہ سوگَو مریسہ گڑاس کین۔ داڑان تو بے چیٹی (انارکی) ودی مریک۔
ای خُلی چُرت اس اسُل افت ولے گنوک آتیتوں باہ خلنگ اٹ انت فائدہ دوئی؟ انت دا بھاز اَف کہ کنا اُست مشال خان نا ناگناہ مننگ آن بیدس ہم اونا زندہ آ اُرا والا تا کچ اسیٹی اِن و بَر ءُ خلیس تون زند گدریفنگ نا حوال آتے بننگ آن اینو ہم مُونجا مریک۔
ای تنیا تو افٹ، کنا ڈَول ءُ خیالداری کروک کروڑ آک اریر۔ جموں نا ہشت سالہ بکر وال آصفہ نا ننگ آ دو بٹنگ و کسیفنگ نا حوال ہندوستانی میڈیا و دلی اسکان سر مننگ آ مُسہ تُو لگا، ای تینا اسہ بخال سنگت ئسے آن سوج کریٹ داخہ وقت انتئے لگا؟
او ای میل کرے کہ ایلم ہیت دادے کہ مسہ تُو نن اندا کچ کریسہ کرین کہ دا چُنا نا پِن آصفہ مفروس تو اخہ در جوان مسکہ و اگہ دا حادثہ جموں نا جاگہ غا اڑیسہ یا جھار کھنڈ یا پین ہند ئسے آ مروس گڑا ہرا ریلیک اینو پیشن مننگ ءُ او فروری اٹ پیشن مروک مسرہ۔ آصفہ نا حادثہ بھاز بھلن ءِ ولے ضمیر ہم اینو پگہ ایب کیب اٹ دانگ اینگ اریسہ سما کیک۔
 |
| Asifa |
قندوز اگہ اوغانستان اٹ مفروسُس گڑا ننے تینا سوختئی ءِ پاش وڑ اٹ نشان تننگ اٹ آسانی مسکہ، یمن اٹ اگہ بشار الاسد نا حکومت مروس تو گڑاس پاننگ مسکہ۔ محمد بن سلمان اگہ سعودی ولی عہد مننگ نا جاگہ غا شام نا صدر مسکہ گڑا بدلی دوست تخوک پالیسی تے بھاز ایشکامی تون بد پاننگ مسکہ۔
اخلاقیات و ضمیر نا بے جارات مننگ تینا جاگہ غا ولے اینو پگہ ردِ عمل خانہ غاتیٹ بشخوک تخوئی مریک۔ کس اس پین گڑاس سرپند مف۔
ننا منافقت ءِ گم کبو دا پابو کہ ننا ایب کیب و زند آتیٹ بدلی انتئے بَننگ اَف؟ آخر ننا قصور انت ءِ؟